மூழ்கிய இந்திய மீனவப் படகிலிருந்து இரு சடலங்கள் மீட்பு

மூன்றாம் இணைப்பு

யாழ்ப்பாணம் − நெடுந்தீவு அருகில் விபத்துக்குள்ளான இந்திய மீனவப் படகிலிருந்து இருவரின் சடலங்கள் கண்டெடுக்கப்பட்டுள்ளதாக இலங்கை கடற்படை தெரிவிக்கின்றது.

கடற்படை பேச்சாளர் கெப்டன் இந்திக்க டி சில்வா இதனை எமது செய்திப் பிரிவிற்கு கூறினார்.

மூழ்கிய படகிலிருந்தே இந்த சடலங்கள் கண்டெடுக்கப்பட்டுள்ளன.

எவ்வாறாயினும், குறித்த பகுதியில் தொடர்ந்தும் தேடுதல்கள் இடம்பெற்று வருவதாக அவர் கூறினார்.

இந்திய அதிகாரிகளின் தகவல்களுக்கு அமைய, நான்கு மீனவர்கள் குறித்த படகில் பயணித்துள்ளதாக சந்தேகிக்கப்படுகின்றதாக அவர் குறிப்பிட்டார்.

எஞ்சிய இரு மீனவர்களையும் தாம் தொடர்ந்து தேடி வருவதாக கடற்படை ஊடகப் பேச்சாளர் தெரிவித்தார்.

இரண்டாம் இணைப்பு

யாழ்ப்பாணம் − நெடுந்தீவு பகுதியில் மூழ்கிய இந்திய மீனவப் படகு மூழ்கிய இடம் கண்டுபிடிக்கப்பட்டுள்ளது.

கடற்படை ஊடகப் பேச்சாளர் கெப்டன் இந்திக்க டி சில்வா தெரிவித்தார்.

எனினும், காணாமல் போன மீனவர்கள் தொடர்பான தகவல்கள் எதுவும் கிடைக்கவில்லை என அவர் கூறுகின்றார்.

மூழ்கிய படகை மீட்பதற்கான நடவடிக்கைகளை ஆரம்பிக்க எதிர்பார்த்துள்ளதாகவும் அவர் குறிப்பிட்டார்.

முதலாம் இணைப்பு

யாழ்ப்பாணம் − நெடுந்தீவு கடலில் இலங்கை கடற்படை படகுடன் மோதுண்டு, கடலில் மூழ்கிய மீனவப் படகை தேடும் பணிகள் இரண்டாவது நாளாக இன்றும் ஆரம்பிக்கப்பட்டுள்ளன.

இன்று (20) அதிகாலை முதல் மீனவப் படகை தேடும் பணிகள் ஆரம்பிக்கப்பட்டுள்ளதாக கடற்படை ஊடகப் பேச்சாளர் கெப்டன் இந்திக்க டி சில்வா தெரிவிக்கின்றார்.

குறித்த படகில் பயணித்த மீனவர்களை இதுவரை கண்டுபிடிக்க முடியவில்லை என அவர் கூறினார்.(TrueCeylon)

முழுமையான செய்தி